في حاجات

في حاجات
في حاجات لما بنساها

بنساكي وياها

أول مره لمست ايديك نسيتها

نسيت ازاي قولتلك بحبك وحستها


نسيت اني في يوم من الايام

وقفت قصادك ومن غير اي بداية للكلام
قولتلك بحبك

واستنيتك وقتها

بس مش فاكر اد ايه ممكن يكون ثواني وممكن تكون ساعات ولكنهم عدو عليا سنين

مبقتش فاكر انك رديتي عليا ساعتها

نسيت أنك كنتي ليا في يوم

نسيت انك بكيتي كتير

لما سبتك يوم من غير مكالمه


من غير ما أسال عنك ولا حتي اطمن

كنتي بتموتي لما اقولك اني مسافر

عشان بروح اماكن الشبكة فيها بتقع

مبتقدريش تتطمني عليا


نسيت اد اية لهفتك لما ابقي جاي من السفر

والشبكه ترجع لموبايلي

الاقيكي اول واحده بتتصل

عشان تتطمن عليا .. رغم اني مجربتش اتصل انا بيكي ولا مره

ولكني كنت بحاول اكلمك في خيالي

وقولتلك كلامك كتير اوي

بس تقريباً شبكة دماغي كمان كانت واقعة

في اليوم اللى جيتي فيه تقوليلي كفاية

منقدرش نكمل مع بعض !!

انا استغربت

بس بيني وبينك

انا ناسي انا كنت مستغرب لية

يمكن لاني كنت اتوقع اي حد يعمل كده الا انتي

بس عادي ..
انا نسيت دلوقتي شكلك

بحاول كتير افتكر صورتك ولا أقلب في خيالي علي اي لحظة ما بينا

لاقيت اننا كنا بعاد عن بعض اوي

وأتاكدت بجد

ان كل حاجة نسيتها ما بينا

نسيتك وياها